Tembang Dhandhanggula kanggo SMP kelas IX

 

Tembang Dhandhanggula kanggo SMP kelas IX

Dening Eko Hastuti

 

Tembang Dhandhanggula

Tembang Dhandhanggula iku salah sijine tembang Macapat kang kaemot ing Serat Wulangreh anggitane Sri Pakubuwana IV, raja ing Surakarta. Panjenengane miyos/lair tanggal 2 September 1768 lan seda yuswa 53 taun, ngepasi tanggal 2 Oktober 1820. Serat Wulangreh arupa tembang Macapat kang dumadi saka 13 pupuh, yaiku Dhandhanggula, Kinanthi, Gambuh, Pangkur, Maskumambang, Megatruh, Durma, Pocung, Mijil, Asmarandana, Sinom, Wirangrong, lan Girisa. Pupuh loro sing pungkasan iku kalebu tembang Tengahan. Saben pupuh tembang, ngemot isi piwulang utama, pitutur utawa pitedah kang pantes dadi tepa tuladha, dadi paugeran wong ngaurip. Wulang reh saka tembung wulang tegese ajaran, dene reh asale saka reh-rehan utawa bawahan. Dadi wulangreh mengku teges ajaran saka panguwasa marang reh-rehan/bawahan. Ing wektu iki, bisa ditegesi piwulang kanggo masarakat. Tembang Dhandhanggula isine bab cara milih guru utawa wigatine wong nduweni kawruh/ilmu pengetahuan.

Pada 1

Pamedhare wasitaning ati,
cumantaka aniru Pujangga,
dhahat mudha ing batine.
Nanging kedah ginunggung,
datan weruh yen keh ngesemi,
ameksa angrumpaka,

basa kang kalantur,
tutur kang katula-tula,
tinalaten rinuruh kalawan ririh,
mrih padhanging sasmita.

 

Tegese tembung angel pada 1

pamedhare      : anggone nglairake

wasitaning ati : niat/krenteg

cumantaka      : kuwanen/kemendel

niru pujangga  : nyonto pujangga (wong sing pinter nganggit buku/kitab)

dhahat mudha : enom banget/rumangsa bodho

kedah              : kudu

ginunggung     : dialem

datan wruh      : ora ngerti

ngesemi          : ngece

ameksa ngrumpaka     : meksa nganggit senajan durung mampu

basa kang kalantur      : bisa kang keladuk/kurang becik

tutur kang katula-tula : kangelan olehe menehi pitutur

tinalaten rinuruh         : yen ditlateni kanthi sabar/sareh

kalawan ririh              : lan lirih/alon

mrih padhanging sasmita: supaya dadi nasehat kang cetha

Gancaran pada 1:

Piwulang iki sakawit niat niru kaya pujangga, senajan ing batin aku rumangsa bodho, nanging kudu dialem, ora ngerti yen akeh sing ngece, amarga meksa kang sejatine durung kuwat nglakoni, mula olehe ngripta pitutur mau nganggo basa kang ora becik. Kabeh mau yen dilakoni kanthi sabar lan alon, bisa gawe pituduh.

Pada 2

Sasmitaning ngaurip puniki,
mapan ewuh yen ora weruha,
tan jumeneng ing uripe,
akeh kang ngaku-aku,
pangrasane sampun udani,
tur durung wruh ing rasa,

rasa kang satuhu,
rasaning rasa punika,
upayanen darapon sampurna ugi,
ing kauripanira

 

Tegese tembung angel pada 2:

Sasmita        : tandha/pralambang

ngaurip        :wong urip

nora weruha  : ora bisa mangerteni

tan jumeneng: ora tentrem

ewuh             : pakewuh

sampun udani: wis ngerti

darapon         : supaya

uninga           : mangerteni

satuhu            :  sejati

upayanen       : ikhtiyara

darapon sampurna : supaya sampurna

kauripannira     : uripmu

 

Gancaran pada 2:

Pralambange urip kuwi ora bisa dimangerteni yen sliramu ora paham pralambang mau. Wong kang kaya mangkono, uripe lan batine ora bisa tentrem. Akeh kang padha ngaku-ngaku yen wis mudheng, tur durung duwe rasa, rasa kang sejati. Mulane dadi wong amrih mangerteni rasa pangrasa kang sejati supaya uripe sampurna.

 

Pada 3

Jroning Quran nggoning rasa yekti,
nanging ta pilih ingkang uninga,
kajaba lawan tuduhe,
nora kena den awur,
ing satemah nora pinanggih,
mundhak katalanjukan,
tedah sasar susur,
yen sira ajun waskita,
sampurnane sajroning badanireki
sira anggugurua

Tegese tembung angel pada 3:

rasa yekti: rasa sejati

uninga : dimangerteni

tuduhe             : dhawuhe

sora kena         : ora kena

den awur         : diawur

satemah           : banjur

katalanjukan   : kleru tampa

sasar susur      : kesasar

waskitha          : ngati-ati/awas

badanireki       : awakmu

 

Gancaran pada 3:

Menawa arep golek prakara sing bener iku dumunung  ing Qur’an, nanging ora kabeh wong bisa paham marang isine, mung wong tartamtu sing paham amarga wis oleh pituduh saka Gusti. Benere lambang/isyarat ora kena dicampuradhuk, kudu dipilah-pilah, ora bakal ana titik temune. Mulane, yen sliramu kepingin golek kasampurnaning urip, kudu golek ngelmu/meguru.

 

Pada 4

Nanging yen sira anggeguru kaki

Amiliha manungsa kang nyata

Ingkang becik martabete

Sarta kang wruh ing hukum

Kang ngibadah lan kang ngirangi

Sokur oleh wong tapa

Ingkang wus amungkul

Tan mikir pawewehing liyan

Iku pantes sira guronana

Sartane kawruhana

Tegese tembung angel pada 4:

sira      : kowe

nggeguru : golek guru

manungsa kang nyata : wong sing bener

becik martabate : dhuwur martabate/drajad

wruh ing kukum : mangerteni hukum

tapa : semedi

amungkul        : tekun/sregep

pantes sira guronana : pantes kok guroni

kawruhana      : koktiru

 

Gancaran pada 4:

Yen sliramu arep golek guru, pilihen guru sing bener, yaiku guru kang dhuwur martabate, sregep ngibadah lan manembah marang Gusti. Becik maneh yen oleh wong sing seneng tapa, wis lerem atine, ora ngarep-arep piwalese liyan. Wong kang kaya mangkono iku kang pantes kokguroni lan tirunen tumindake.

Pada 5

Lamun ana wong micareng ngelmi
tan mupakat ing patang prakara,
aja sira age-age,
anganggep nyatanipun,
saringana dipun baresih,
limbangen lan kang patang :
prakara rumuhun,
dalil qadis lan ijemak,
lan kijase papat iku salah siji,
ana-a kang mupakat

Tembung angel pada 5:

Lamun             : yen

micareng ngelmi : micara ing ngelmu (ngomongake ilmu)

tan mupakat    : ora kena ninggal

sira age-age    : kowe kesusu/enggal-enggal

anganggep nyatanipun : nganggep bener

saringana        : disaring/dipilih

rumuhun         : dhisik

dalil                 : pituduh singgo wong Islam kanggo mutus prakara.

kadis               : hukum Islam, Sunnah Rassul, selain Al-Qur’an

ijemak             : kesepakatan bab salah siji hukum sing ora nglanggar Qur’an karo Kadis

kiyase              : madhakake sawijining kedadeyan karo kedadeyan sing wis ana nash-e

mupakat          : maedahi/mupangati

 

Gancaran :

Yen arep golek ngelmu kudu nggatekake patang prakara, yaiku dalil, kadis, ijmak, lan kiyas. Menawa ngelmu kasebut ora jumbuh karo patang prakara iku, mula aja grusa-grusu disinaoni. Pilihen ngelmu kang bener la nana mupangate.

 

Pada 6

Nora kena lamun den antepi,
yen ucula sing patang prakara,
nora enak legetane,
tan wurung tinggal wektu,
panganggepe wus angenggoki,
nora kudu sembah hyang,
wus salat kateng-sun,
banjure mbuwang sarengat,
batal haram nora nganggo den rawati,
bubrah sakehing tata

 

Tegese tembung angel:

nora kena lamun den antepi   : ora kena diantepi

yen ucula sing patang prakara : yen ora jumbuh karo patang prakara

nora enak legetane : ora usah ditampa

panganggepe   : pangirane

mbuwang sarengat : ninggal aturan

bubrah sakehing tata : gawe rusak uripe.

 

Gancaran pada 6:

Menawa ngelmu kang ditampa orajumbuh karo parang prakarakasebut, prayoga ora usah ditampa. Wong aja nganti lali manembah marang Gusti. Yen nganti ora manembah, bakal ninggalake aturan agama, saengga ora kenal endi sing halal lan sing haram, bakal rusak uripe.

Pada 7

Angel temen ing jaman samangkin
ingkang pantes kena ginuronan,
akeh wong jaya ngelmune,
lan arang ingkang manut,
yen wong ngelmu ingkang netepi,
ing panggawening sarak,
den arani luput,
nanging ta asenengan,
nora kena den wor kakarepaneki,
pancene parijangga

Tegese tembung angel pada 7:

temen : temenanan

samangkin      : saiki

kena ginuronan: ke didadekake guru

panggawening sarak: tumindak sarak/nglanggar hukum

den uwor         : dianggep padha

janmi               : manungsa/wong

pepancene priyangga:pancen wong duwe panemu dhewe-dhewe

Gancaran pada 7:

Angel banget jaman iki golek wong sing patut ditiru. Akeh wong sing tawa-tawa ngelmune ning ora padha gelem. Malah ana wong sing wis nglakoni ngelmu mau jumbuh karo pranatan, malah dianggep luput. Saben wong duwe panganggep dhewe-dhewe, ora kena dianggep padha. Wong iku kekarepane ora padha, amarga duwe pepinginane wong beda-beda.

 

Pada 8

Ingkang lumrah ing mangsa puniki,
mapan guru ingkang golek sabat,
tuhu kuwalik karepe,
kang wus lumrah karuhun,
jaman kuna mapan si murid,
ingkang pada ngupaya,
kudu angguguru,
ing mengko iki ta nora,
Kyai Guru narutuk ngupaya murid,
dadiya kanthinira

Tegese tembung angel pada 8:

lumrah            : umum/wajar

golek sabat      :  murid

karuhun           : jaman mbiyen

ngupaya          : golek

kudu anggeguru: kudu sinau

naruthuk          : nggolek

dadiya kanthinira: kang dikarepake

 

Gancaran pada 8:

Ing jaman saiki, wis dadi padatan (lumrah/umum), guru sing golek murid, beda ing jaman biyen, murid sing golek guru. Pancen keprungu saru wong guru kok nggoleki murid. Nanging kabeh mau amarga kagawa wolak-waliking jaman. Kabeh mau kanggo cekelan wong golek ngelmu kaya kang dikarepake.

Pokok-Pokok Isi tembang Dhandhanggula pada 1-8:

Tembang Macapat

1. Kuwanen medharake pitutur supaya dialem. Kamangka sejatine durung kuwat olehe nglakoni nanging kuwanen menehi pitutur. Senajan akeh sing maido lan ngisin-isini, nanging kanthi sabar lan tlaten wusana bisa dadi pitutur kang cetha.
2. Wong kang ora bisa mangerteni pralambange urip, batineora bakal tentrem. Akeh wong kang ngaku-aku wis paham bab pralambang urip, kamangka sejatine durung ngerti apa-apa. Mula dhewe kudu ngerti pralambang supaya tentrem uripe.
3. Yen arep nyinau prakara kang bener, goleka saka sumber Al-Qur’an. Ora kabeh wong paham isine Al-Qur’an kejaba sing wis oleh pituduh. Mula ora kena ngawur olehe anggone nyinaoni. Supaya uripmu sampurna, mula kudu maguru kanthi cara kang bener.
4. Yen arep meguru, pilihen guru kang dhuwur martabate, paham kukum agama, sregep ngibadah, gelem prihatin, lan ikhlas tanpa pamrih.
5. Yen luru ngelmu pilihen kang adhedhasar patang perkara, yaiku dalil, kadis, ijemak, lan kiyas. Luru ngelmu kudu ngati-ati aja grusa-grusu, supaya ngelmu sing disinaoni kuwi bener la nana mupangate.
6. Manungsa duwe kuwajiban manembah marang Gusti Allah. Wong kang ninggalake syariat agama, banjur ora bisa mbedakake endi kang halal lan karam. Manungsa kang ora gelem manembah marang Gusti Allah uripe bakal rusak.
7. Jaman saiki angel banget luru wong kang bisa diguroni. Akeh wong kang nawakake ngelmu, nanging arang kang gelem nampa. Ana kang nglakoni ngelmu manut pranatan nanging malah dianggep luput. Awit saben pawongan duwe panemu dhewe-dhewe marang sawijining ngelmu.
8. Jaman saiki wis lumrah yen guru kang mrana-mrene luru murid. Jaman biyen, murid kang luru guru. Iki pratandha anane owah-owahan, wolak-waliking jaman.