TEMBUNG GARBA

 

TEMBUNG GARBA

Dening Eko Hastuti

Tembung Garba

Tembung Garba iku dumadi saka tembung loro utawa luwih kang digandheng dadi siji supaya ringkes, kanthi nyuda cacahing wanda (suku kata). Garba tegese weteng utawa ringkes. Digarba tegese digandheng dadi siji supaya ringkes.

Tembung garba kerep tinemu ing teks kang kalebu karya sastra, tuladhane tembang jalaran bisa kanggo ngetrepake guru wilangan (cacahing wanda ing saben sagatra). Kejaba kuwi anane tembung garba uga ndadekake tembung mau nduweni rasa pangrasa kang endah. Alasan liya, tembung loro/luwih mau diringkes supaya luwih trep karo pakecapane wong Jawa.

Tuladha tembung Garba:

1.      Age      + gelis  = aglis

2.      Ana      + ing    = aneng

3.      Arane   + iki     = araneki

4.      Dadi     + ewuh = dadyewuh

5.      Kadi + kaya     = kadya

6.      Lebda   + ing    = lebdeng

7.      Nara     + endra = narendra

8.      Maha    + resi    = maharsi

9.      Mara    + ing    = mring

10.   Nata     + ing    = nateng

11.   Mungguh + ing            = munggwing

12.   Prama   + iswari = prameswari

13.   Prawira + ing    = prawireng

14.   Raja     + endra= narendra

15.   Ratu     + ayu    = ratwayu

16.   Isih      + enom= sinom

17.   Sarwa   + endah            = sarwendah

18.   Sesotya + adi    = sesotyadi

19.   Sira      + iku    = sireku

20.   Suka     + ing + tyas      = sukengtyas

21.   Tumuju            + ing    = tumujweng

Wewatone sandi, miturut, (Memetri Basa Jawi, S. Padmosuekotjo kaca 130)

1.    a + a     = a (jiwa + angga = jiwangga, maha + raja = maharaja, maha + arsi = maharsi)

2.      a + i     = e (saka + ing  = sakeng, tumeka + ing = tumekeng, prapta + ing = prapteng)

3.      a + u    = o (sara + utama = sarotama, wira + utama = wirotama)

4.      a + o     = o (dadya + ojat = dadyojat)

5.      i + i      = i (siti + inggil = sitinggil)

6.      i  + a   = ya (lagi + antuk = lagyantuk, mugi + antuk = mugyantuk, dupi          + arsa = dupyarsa)

7.      u + e    = we (jalu + estri = jalwestri)

Tuladha ukara kang migunakake tembung Garba:

1.      Lakune Raden Rama karo Dewi Sinta olehe ngumbara wus tumekeng tepising wana, ora wetara suwe wong sakloron banjur lumebeng telenging alas kang isih gung liwang liwung.

2.      Pirsa Kidang Kencana kang merak ati, Dewi Sinta sukengtyas banjur nyuwun dicekelake dening sang garwa, Raden Ramawijaya.

3.      Prapteng Kedhaton Alengka, Rahwana mamerake sesotyadi kang pating glebar marang Sinta supaya gelem dipundhut garwa, nanging Sinta tetep setya mring garwa, Raden Rama.

4.      Anoman iku senajan arupa kethek nanging bisa dadi prajurit kang prawireng aneng madyaning palagan, wani mungsuh narendreng Alengka kang asma Prabu Rahwana.

5.      Lagyantuk sadina olehe ngumbara jalwestri kuwi wis tumujweng pinggiring wana awit lakune aglis jumangkah mecaki bantala.