Teks Sandiwara "Raja Kidang Garungan"

 

Raja Kidang Garungan

 Babak 1 Adegan I

(Ing jeron kraton katon tumata apik. Kursi gedhe pinajang rinengga pepaes dekoratif kang nggambarake swasana ing sajroning taman kaputren.ratu Shinta Dewi lenggah ing kursi sinambi nggawa pengilon kanggo dandan, dikancani para emban cacah loro. Pasuryane katon seneng sumringah, karo mesam-mesem ngilang-iling pengilon kang digegem ing astane)

 

NARATOR: Kacarita duk nalika jaman semana, mapan ing kraton Dieng ana sawijining ratu kang wus kawentar sulistya ing warni asma ratu Shinta Dewi. Dasar priyayine isih legan durung kagungan garwa mula akeh banget para raja lan pangeran kang kasengsem kayungyun marang Shinta Dewi. Mula ora mokal yen ndadekake ratu Shinta Dewi tidha- tidha anggone arep milih sapa sing paling pantes dadi calon garwane. Wis pirang-pirang cacahe raja lan pangeran kang nglamar Shinta Dewi. Nanging seprana-seprene durung ana sing mathuk karo kekarepane sang ratu. Kabeh panglamare para satriya mau ditolak dening Shinta Dewi.

 

Emban 1 : “Gusti ratu nyuwun sewu lho menika. Kula tamataken kawit wau kok senyam-senyum kemawon. Sajak happy ngaten?!”

Emban 2     : “Inggih leres gusti ratu, sajak nyela wadi. Dandan wae kawit mau. Niku lho bengesipun sampon ketingal abrit sanget. Kok ya isih diolas-oles wae ta ya!” (sinambi ngilang-iling ngubengi ratu Shinta Dewi).

Shinta Dewi : “Emban, apa aku wis katon ayu? Iki lho, rumangsaku tatanan rambutku isih morak-marik ora karuwan! Ngerti ora kowe, emban? Dina iki aku arep kerawuhan tamu istimewa.”

Emban 1+ 2 : “Tamu istimewa?”

Shinta Dewi  : “Iya, bener emban. Tamu istimewa sing arep ngersakake nglamar aku.” 

Emban 1        : “Walah, yen mung tamu badhe nglamar panjenengan ngaten sampun kathah  sanget ta, gusti ratu? Nanging inggih dereng wonten ingkang mathuk. Dipilah-dipilih terus.   mangke kenging walat malah pikantuk ingkang awon lho gusti ratu! Hara piye coba yen malah entuk rempelan!”

Emban 2         : “Hus.      ! Ngawur kowe emban. Aja sembrana! Iki ratu gustimu lho, malah koksenggaki kaya ngono!”

Emban 1       : “Inggih, nyadhong duka ingkang kathah. Maaf gusti ratu! Maaf   !”

Shinta Dewi : “Ora papa, emban. Aku wis apal banget karo lageyanmu. Senenganmu glenyengan ceplas-ceplos. Ning yen karo wong liya ora kena kaya ngono, ya! Mengko bisa kamurkan kowe emban.”

Emban 1+2   : “Inggih, sendika dhawuh gusti ratu.”

Shinta dewi : “Emban, iki mengko sedhela maneh ana tamu arep sowan. Ayo enggal papane diresiki. Ditata sing apik. Aja lali unjukan lan dhaharan kanggo tamu agung uga dicepakake ya, emban. Wis kana!”

Emban 1+2   : “Inggih, sendika dhawuh gusti ratu.”

Dumadakan ana swara saka njaba

Prajurit          : “Nuwun gusti ratu, wonten ingkang badhe marak sowan!”

Ratu Shinta Dewi gumregah enggal-enggal mapan lungguh ing dhampar kencana kanthi patrap kebak kawibawan.

 

Shinta Dewi  : “Enggal katuran pinarak mrene, prajurit!”

Prajurit          : “Sendika dhawuh Gusti ratu, enggal marak sowan wonten ngarsa panjengan.”

 

NARATOR : Ora watara suwe katon kledhange prajurit kang marak sowan ing ndherekake utusan kang nedya marak sowan ana ing ngarsaning ratu Shinta Dewi. Sang utusan anggone sowan katon mbrengkut ngasta maneka warna sesotya mas inten barleyan kang diwadhahi ing sandhuwuring nampan. Pating pencorong pating galebyar soroting sesotya ndadekake para emban lan ratu Shinta Dewi gumun kamitenggengen, ndomblong ora bisa kumecap apa-apa.

Utusan          : “Nuwun, gusti ratu Shinta Dewi. Sowan kula dhateng kraton Dieng menika minangka utusan saking ratu gusti kula Raja Kidang Garungan. Kapurih ngaturaken sesotya mas inten barleyan minangka bebana kagem ratu Shinta Dewi. Mangga kersaa dipuntampi, ratu!” (kandha mangkono sang utusan karo ngulungake nampan kebak sesotya mau. Nanging ratu Shinta Dewi ora age-age nampani).

Shinta Dewi : “Mengko dhisik kisanak. Peparingmu bebana wujud mas inten barleyan mesthi bakal daktampa. Nanging sadurunge aku kepengin mestkekake dhisik sapa ta sabenere ratu Gustimu raja Kidang Garungan kuwi. Piyayine kaya ngapa lan kepriye watak wantune? Geneya saiki panjenengane raja Kidang Garungan ora melu rawuh ana kratonku kene?

Utusan          : “Kasinggihan ratu. Kepareng matur, bilih ratu gusti kula asma raja Kidang Garungan menika satunggaling nata gung binathara. Sugih bandha bandhu mas inten raja brana. Dedeg piadegipun ageng inggil gagah pideksa. Lan malih sampun kawentar minangka raja ingkang sekti mandra guna tanpa tandhing. Makaten katrangan kula ngengingi ratu gusti kula raja Kidang Garungan. Pramila mangga kersaa nampi bebana menika, minangka atur panglamar dhumateng ratu Shinta Dewi.

Shinta Dewi : “Ooo, raja gung binathara, gagah pidekso, sugih rojo brono tuwin sekti mondroguno. Enggal matura marang ratu gustimu raja Kidang Garungan, yen ta panglamare marang aku daktampa kanthi gumbiraning manah. ( ngendika mangkono karo enggal-enggal nampa nampan saisine)

Utusan          : “Sendika dhawuh gusti ratu. Salajengipun kepareng badhe nyuwun pamit.”

Shinta Dewi : “Iya, iya kisanak. Matura marang raja Kidang Garungan enggal-enggal tindak mrene. Aku banget ngantu-antu rawuhe.”

Adegan II

NARATOR : Ing Kraton Dieng wis samapta ing gati bakal nampa tamu agung yaiku raja Kidang Garungan calon garwane ratu Shinta Dewi. Awit saka panyuwune ratu Shinta Dewi, raja Kidang Garungan kasuwun enggal- enggal rawuh ing kraton Dieng. Ratu Shinta Dewi wis manteb banget anggone milih raja Kidang Garungan minangka calon garwane.

Shinta Dewi : “Emban, aku kok dheg-dheg an kaya ngene rasane? Saiba gagahe calon garwaku mengko ya, emban?”

Emban 1 : “Gagah, sugih, sekti mandraguna. Harak ngaten ta ingkang dipunidham- idhamaken panjenengan minangka calon garwa?sampun kasembadan sedaya gusti ratu.”

 

Emban 2 : “Inggih gusti ratu. Kados sampun mathuk kaliyan idham-idhaman Panjenengan. Mugi-mugi enggal kasembadan gusti ratu Shinta Dewi enggal kagarwa dening raja Kidang Garungan.”

Shinta Dewi         : “Iya emban, muga-muga Gusti kang akarya jagad ngabulake panyuwunku. Aku bisa oleh garwa kang sampurna. Gagah, sekti mandraguna lan sugih bandha-bandhu.

NARATOR          : Saka kadohan katon dampyak-dampyak pangombyonge raja Kidang Garungan arsa sowan ratu Shinta Dewi. Awit saking ketaman rasa seneng lan gumbira kang matumpuk-tumpuk ratu Shinta Dewi nganti ora wani nyawang blegere raja Kidang Garungan. Pasuryane tumungkul jero mangandhap.

Kidang Garungan : “Ratu Shinta Dewi calon garwaku kang sulistya ing warni. Netepi panyuwunmu yen ta aku kudu enggal-enggal nemoni sliramu ing kraton Dieng kene. Saiki aku wis tekan kene diajeng. Iki dakgawakake maneh sesotya klangenanmu. Tampanana ratu.”

NARATOR          : Gumeter atine ratu Shinta Dewi nalika mirengswarane raja Kidang Garungan kang gumleger mrebawani. Batine sang ratu tansaya manteb anggone nemtokake pilihan kanggo milih calon garwa. Banjur tuwuh rasa wani kepngin nyipati kaya ngapa wujude calon garwane iku. Wiwit saka ngisor ratu Shinta Dewi ngematake samparane raja Kidang Garungan. Alon-alon nyawang munggah mandhuwur nganti ndangak merga saking dhuwure dedeg piadege raja kidang garungan kuwi. Nanging saiba kagete ratu Shinta Dewi barang ngematake mustakane sang raja.

Shinta Dewi         :    “Oh ....jagad...jagad dewa bathara. Apa kuwi? Mustakane....

 

Gladhen:

Sawise teks sandiwara ing dhuwur kokwaca, ayo sebutna tembung-tembung angel lan tegesana!